FMR mathingpai marada NHRCli MOU misanghaira: Sword Vashum

EKHON|UKHRUL: Tangkhul Naga Long Ngachashing Longshim 23rd August thang kapamli Sword Vashum, TNL Presidentna points 10 khamichili Free Movement Regime (FMR) thinghaora kachi hi masapai mara kachi maramhi tarik 30th July 2024 thang Vijayabharathi Sayani, Acting Chairperson, National Human Rights Commission of India li Memorandum misang hairada hanga. Sword Vashum wui Presidential Address chi azingli yangmilo.

“Remeikapda Ithum wui Kasa Akhava li khayakashi kala ningkashi phongshok dalei. Tuikhoka (Speaker) na atam khami eina ngasoda aja wui 23rd Aug. 2024 TNL Ngachashing Longshimli razang kahaiya Tangkhul khaung kachiva wui Awunga, Chairman, Longshim Minganin, TNL former activists, Departmental, Representative, Well wishers, Observers, ladies & gentlemen.

TNL Longshim Minganin bingna ili leishida tarik 22nd May 2024 thang TNL wui mishan khare, President sakhavai election commissioner, TNL na election conduct samida kapang kaya. Tarik 31″ May 2024 thang Chief Justice, TNLK na tuingashit khuimida chithang President in-charge TNL na handing & taking change over wui ranyei singka mida President TNL wui chairli pamphoka.

1. Tangkhul hi spiritually, politically kala economically khangachei khuira khavai hotnara kachi hi iwui khamataiya ningrin na.
2. Tangkhul (TNL) li ina ningyang tongtingda chikatmi lakra kachi amaha/amajut sada TNL President wui salary/Honorarium kachang kachida Rs. 30,000/- (thirty thousand) hi makhuila chikatmira.
3. Tangkhul khaung kachiva leishi manolak eina okthuirumser khavai kashap eina tangda case mangahei ngarokla chamna kakhui (compromise) salaga chinaongara, athei-äsa, ramnao, kha khongnai kala area kachi makhaila Tangkhul Naga naobing shimkhur akhana kachiwui ningrin/ningchuk leilaga mangashong muiva khavai kala jatyur kateina yangkada athum li ngahanshap khavai seiha samingarok sersa. Kashap eina tangda ilak-ka I,I,I kachi tuiyar mashichinla khangaruma tuiyar kala tuiza shichinmi serlu.
4. Tangkhul Naga, Naga miyur wui akai akhalak kada phabkata wui lungli tarik 20th June 2024 thang Qr. Sulanthang Lotha, President, Naga Hoho la TNL office li ungsamphangda Naga alungli kaikhangarok maleila chingri eina panrum khavai khararchan sangarum haira.
5. 29th June 2024 thang FNR wui consultative meeting Kohima li vazanga. Naga peoplehood kachi hina angayung (roots) sada imayur ngatang kakhuili chikat ngarok sersa kachi hina iwui theme na.
6. NSF wui President, Gen. Secretary lila sideline li samphang khuiya. Ishi Naga yur kaikhayangda leilakha eina tangda imayur mashun khaya, Pangshap maleirar lakmara kala khipanakha imayurli sakda makhuimi mara. Chieina pheikar khare sada constitution na khamaya, Naga integration kachi hi ithum civil society bingwui khamataiya otngarut ngasa phalungra, TENYME kathanna kaikhali samkaphang atam lila ngaraikacha integration issue hiwui vang ngazek ngarokka.
7. 3 July 2024 thang UNC wui top leadership na hohaida Senapatili (Tahamzam) samphanga. 2024 wui parliamentary election kupsang haira ara mangashong ithum khokkha sada yurwui yaruiwui otmanga kayakha ngatangkhui/ngararkhui khavai apongli machuk khangarum hina khamataiya tuipong saya.
8. Tangkhul wui hakmeikap kachi Long (apex body) wui office complex hi kathak wui alungli semka khavai Tangkhul wui kathem thang khamei bing, katom khangai bing, chikatmi khangai bing saikorana katom khami, ngachon khami manga eina construction hiwui vang crowd funding account shomi khavai khangaran kupsang haira. 2025 liva haophok khavai salakusa. Yarui katongana seiha sakhami/katom khami manga eina khaya-mashun Tangkhul Naga Yaruishim semka lak haosa.
9. Naga self-administered zone, Myanmar apam hi Vare Varana lumashan khami mayakhami wui manga eina ishi Naga Yurwui vang khuira – seina khalonga Canaan ngasarakho. Kakharam khangamar, khali kasa, kapik kakhayang wui pangshap, kathem kathei kasawui vang eina ngaponthui ngasak kahai ngasa haikha naongara, āra-āzā khanuithot wui vang khonshat mirin mathuisang khami ngasalakra. Mamalaiasa lam tampak hili khalei ngaleilung kala ngaleitung wui exploration/exploitation katonga ishi theikazak zak laga naothot naothot wui kankhana plan/programme leilaga singkaser khavai saphalungra. Okathuiwui pangshap kasinga bingna imayurli Khokkha sada mapanrum/maokthuirum ngasakmarada, ngakai ngakakda haimisalala ithumwui khamashung thangmet pangshap na yuiphalunga kala ithum khokkha saphalungra kachiwui amaha sada ara ishi somra (Myanmar) wui minganin 5 ishi TNL assembly li associate members sada chihora khavai khamong shomi haosada leihaira.
10. Naga imayur wui political issue wui solution khuira khavai wuivang Naga Yur eina Gol ceasefire leilaga ithum wui apam hili Armed Forces (special power) Act. 1958 khalei hi khuishokmi phalungra kachina. Kala Zingshoshong khalei ichina ngara, Nagas Myanmar inishiwui marakli artificial boundary leida khalei hili Free Movement Regime (FMR) thinghaora kachi hi masapai mara kachi maram khani hi tarik 30th July 2024 thang Qr. Vijaya Bharatihi Sayani, Acting Chairperson, National Human Rights Commission of India li Memorandum misang haira.”