By Louise Ngasainao (Retd Director, District Agri., Ukhrul.)
Ekhon| Aug 10, 2023: Double Cropping kachiwui kakhalatna ngaraikacha luipam akhali kala zingkum akhali heiwun khani kakhalok kala langmei ngaraikacha athei shirai kala (Ma) tharazat kumkhali khanishita hatkakhui hili Double Cropping hoya (Linglon luikachi).
Miwui mashing chungsang maman haodakashak kaza kala theishirai yurla chungmeida darkar samaman kahai atam hitharan Double Croppinghi luikhavanao bingna makasa masa kapai atam rakahaina. Marama ithumwuili leida khalei ngalei kala luipam hakkasang maleila chichinghaoda leida khalei luiwuk kala ngalei chili khani shita heiwun makhui akha kashak kaza katang kala kathai kacham shokphalung haoki kachina. kashak kaza hongtap eina kala lansin mathangasaksa jiakha ithum double cropping hi imaramli singka phalungrali.
Double Cropping Tangkhul kaphunglila singkahaosa chiakha khimamei athei shirai kala kachi katha lingra khala kachihi kathei darkar saya. Kala ngalei leiha wui kasik kasa kala zingrot ( Tara ) samkaphang kalamasamkaphang hila matailak kahaina.Chiwui athishurta otsin chi singkaki kachina,maningakha chotman makhuimara.Langmeida athei shirai hanthothap kala mâyur kakapang hila matailak kahai otngarutna. Marama atheishirai kala mayur kachungkha leiya. Athumwui khaling eina hatkakhui atam ngateiteiya. Chiya atam shakhamei kala sangkhamei leiya. Lumkachang kala si kachang lingkapai maling kapai leiya.
Double Cropping sakapai han thothapbing chiya ;- Cabbage (Kopi ), Awon Kopi,Mayangpai, Linglonthei ( Beans ), kala Ma,Khamathei, Kehu (Wheat ) hibinghi doublecropping kasali lingpaiserra. Atunglihangkahai Mayur kala Atheiyur ngateiteidaleiya kala atam shakhamei sangkhamei yurVariety ) kathei darkar saya.
Ma (Paddy) double cropping saka chiakha (short duration variety) atam shakhamei kala kasik khangkashap yur (cold tolerant variety) chiya ch-988, RCM-5, RCM-8 hibing hi February-March atamli shomsang lingsang kikachina, Mayur binghi zimiksho 100-115 daysli minhaoda July-August li hat khui kahai wui thili kakhaniya ma lingsanglui haoki kachina kala china Nov-Decli hatkhuira, Mayur eina double cropping masala June-July li shomsanglaga Oct-Novli hatkahaiwui thili luiwuk chili Kehu lingpaira. Kehu chi March-April li hatki kachina, Maize (Khamathei) la khani shida lingpaiya. Jan-Feb li lingkahaichi May-June kachangli shaira kala June li khaling china Oct-Nov. li hatkhuira.
Khamathei yur (Variety) bing chiya (1) Deccan Hybrid- 85 days (2) Navjot-a 85 days (3) VL Makka – 42, 85-90 days. Potato (Mayangpai) hi khanishida lingpaiya. Jan-Febli khaling china May-Juneli yatkhui kahaiwui thili luipam chili kopi (Cabbage ngalangda linglaga Septemberli kopi lokkahai wui thili mayangpai ( Potato ) lingluipaiya. China Dec-Jan atamli yatkhui ki kachina. Chithada sada Beans (Linglonthei) la Feb-Marchli khalingchi June-Julyli lokkhuihailaga Augustli lingsang luipaiyakala chi Nov-Dec. atamli hatkhuira.
Double Cropping kasawui kankhanana kumkhali heiwun khani shida samphangrakala hantothap season atam makhaninglilasamkaphang china (Market price) leilon- kasali pheisa chungmeida aman mathameida samphang paiya.
Double Croppinghi Tangkhul kaphungli (intensive) chungda kala haklak eina sapaiya kha kanrei sei kachipen hina kasak leihaowa. Farm kala luiwuk saikora pan (Fence) sakikachi china ngachang chatngasaka. Kala chili langmeida tara marang kaida masamphang kharar hinala maram sada ithumwui luikhavanao bingna kankhana theitheilala masangayaomana. Amachi atam chada kala peida masamkaphang hinala maram akhana. Yarui lansin mathameisa chiakha double cropping hi khuikaphalungrali. Sei kachipenhi ain ( Law ) TNL na semlaga Tangkhul Area saikorali kakham darkar sahaira.
(The article was first published at The Legacy journal. The writer, Louise Ngasainao was the Deputy Director of the (Ukhrul) District Agriculture office when the piece was written.)
